Դեղերի գովազդին ներկայացվող պահանջներ

ՀՀ Առողջապահության նախարարությունը հետևողական գործընթաց է սկսել, որը վերաբերում է մեր հանրապետությունում դեղերի, բուժտեխնիկայի և բուժական մեթոդների գովազդի ընթացակարգին, ինչը առավելապես կարգավորվում է «Գովազդի մասին» ՀՀ օրենքով և ՀՀ կառավարության 2006 թվականի համապատասխան  որոշմամբ:

Քաղաքացիներին և իրավաբանական անձանց մատուցվող ծառայությունների  որակը բարելավելու, գովազդի լիցենզավորման գործընթացն առավել թափանցիկ դարձնելու, դեղերի շուկայի գոցազդի ոլորտը կարգավորելու նպատակով ԱՄՆ ՄԶԳ Հայաստանի առողջապահության համակարգի հզորացում (HS-STAR) ծրագրի օժանդակությամբ ՀՀ առողջապահության նախարարությունը մշակել և տպագրել է «ՀՀ-ում դեղերի, բուժտեխնիկայի և բուժական մեթոդների գովազդին ներկայացվող պահանջները» ուղեցույցը, որի շնորհանդեսը` մամուլի ասուլիսի շրջանակներում, տեղի ունեցավ ՀՀ ԱՆ Առողջապահության ազգային ինստիտուտում:

Շնորհանդեսի ընթացքում ՀՀ առողջապահության նախարարության աշխատակազմի լիցենզավորման գործակալության պետ Արմեն Սողոյանը լրագրողներին ներկայացրեց ուղեցույցի հրատարակման բուն նպատակը, այն է` առավել դյուրին դարձնել գովազդի հայտի ներկայացման հետ կապված հարցերը, միաժամանակ, հանդես եկավ Հայաստանի Հանրապետությունում  դեղերի, բուժտեխնիկայի և բուժական մեթոդների գովազդի ոլորտին վերաբերող անհրաժեշտ  պարզաբանումներով, պատասխանելով լրագրողների հարցերին, մեկնաբանեց նախարարության կողմից ծառայությունների քաղաքականությունը, ներկայացրեց իրականացվող բարեփոխումներն ու պարզեցումները, որոնք նպատակ ունեն ավելի դյուրին և արագ դարձնել շահառու կողմերի գործողությունները, այն բարեփոխումները, որոնք վերաբերում են քաղաքացիների և իրավաբանական անձանց գովազդի թույլտվության տրամադրման կարգին, բնականաբար, գովազդին ներկայացվող պահանջներին:

«ԱՄՆ միջազգային զարգացման գործակալության «Հայաստանի առողջապահական համակարգի հզորացում (HS-STAR)» ծրագրի կողմից հրատարակված ուղեցույցը  հասարակության և շահառուների իրազեկվածության բարձրացմանն ուղղված քայլերից է, որը մենք անվճար տրամադրելու ենք շահագրգիռ անձանց և կազմակերպություններին,- իր խոսքում նշեց պարոն Սողոյանը, ընդգծելով, որ մատուցվող ծառայությունների որակի բարելավմանն ուղղված թույլտվությունների տրամադրման գործընթացը իրականացվում է նորմատիվ ակտերով սահմանված գովազդատուի և լիազոր մարմնի միջև իրավահարաբերությունների հստակեցման և կիրառման միջոցով: - Դեղերի, բուժտեխնիկայի և բուժական մեթոդների գովազդ իրականացնելու համար շահագրգիռ անձինք Հայաստանում պետք է գործեն հատուկ սահմանված ընթացակարգով` մինչև 30 օրվա ընթացքում: Այս ժամանակահատվածը մենք ձգտել ենք կրճատել մեկ շաբաթով, ինչը նաև դեղամիջոցների շուկայի գովազդի ոլորտը կարգավորելու նպատակ է հետապնդում»: 

Ան լիցենզավորման գործակալության պետը, ինչպես նաև ԱՄՆ ՄԶԳ «Հայաստանի առողջապահական համակարգի հզորացում» ծրագրի հանրային կրթության և քաղաքացիական հասարակության ներգրավման թիմի ղեկավար Նարինե Բեգլարյանը պարզաբանեցին Դեղերի գովազդի օրենքի կիրառման ոլորտն ու նպատակը, գովազդի նկատմամբ կիրառվող հեղինակային իրավունքը, գովազդի օրինականությանն ու հավաստիությանը, պատշաճության անհրաժեշտության մանրամասները, գովազդի զանգվածային տեղեկատվության էլեկտրոնային միջոցները, անչափահասների պաշտպանությունը գովազդի տեղաբաշխման և տարածման ժամանակ, ինչպես նաև գովազդային գործունեությամբ զբաղվող անձանց իրավունքներն ու պարտականությունները, անբարեխիղճ գովազդի հետևանքները, վերջինիս հետ կապված պետական վերահսկողություն իրականացնելու կարգը:

Հարցեր, պատասխաններ, մեկնաբանություններ